Exodus 30

I-alithare lokutshisela impepha

1“Yenza i-alithare lokutshisela impepha, ulenze ngesihlahla som-akhakhiya.

2Amacele womane kumele alingane, kube yingalo ubude lengalo ububanzi, kuthi ukudepha kube zingalo ezimbili – impondo zalo zibe ntonye lalo. 3Huqa amacele wonke ngaphezulu, lempondo zalo ngegolide elicolekileyo ubumbele umqolo wegolide inxa zonke. 4Yenza amasongo egolide amabili ealithare abe ngaphansi komqolo emaceleni amabili ehlukeneyo ukuba abambe imijabo yokuthwala umthwalo. 5Imijabo yenze ngesihlahla som-akhakhiya uyihuqe ngegolide.

6Beka i-alithare phambi kwekhetheni elisithe iBhokisi lobuFakazi, nganeno kwesihlalo somusa esiphezu kobuFakazi lapho engizahlangana lawe khona.

7“U-Aroni kumele atshise impepha enuka mnandi e-alithereni nsuku zonke ekuseni elungisa izibane. 8Kumele impepha ayitshise futhi kusihlwa lapho eselumathisa izibane ukuze impepha itshe kokuphela phambi kukaJehova kuze kube kuzizukulwane ezizayo.

9Linganikeli kuleli-alithare olunye uhlobo lwempepha kumbe umnikelo wokutshiswa loba umnikelo wamabele, njalo lingatheli umnikelo wokunathwa phezu kwalo. 10Kanye ngomnyaka u-Aroni uzakwenza inhlawulelo ezimpondweni zalo. Inhlawulo yeminyaka yonke le kumele yenziwe ngegazi lomnikelo wokuhlawulela izono zezizulukulwana ezizayo. Ingcwele kakhulu kuJehova.”

Imali yenhlawulo

11UJehova wasesithi kuMosi, 12“Lapho usubala abantu bako-Israyeli omunye lomunye kumele anike uJehova inhlawulo yokuphila kwakhe. Ngalokho akuyikuba lesifo esizabehlela lapho ubabala. 13Akuthi lowo lalowo odlulela ngakulabo asebebaliwe anike ingxenye yeshekeli, ngokweshekeli lendawo eyingcwele, okuyisisindo esingamagera angamatshumi amabili. Ingxenye yeshekeli le ingumnikelo kuJehova. 14Wonke umuntu obaliweyo, kusukela koleminyaka engamatshumi amabili kusiya phezulu, uzanikela umnikelo kaJehova.

15Abanothileyo akumelanga banikele ngokudlula ingxenye yeshekeli, labayanga kabanganikeli ngokuncane lapho selinikela kuJehova ukuba lenze inhlawulelo yokuphila kwenu. 16Amukela imali yenhlawulo kwabako-Israyeli uyisebenzise enkonzweni yeThente lokuHlanganela. Izakuba yisikhumbuzo kwabako-Israyeli phambi kukaJehova ukwenzela inhlawulelo yokuphila kwenu.”

Umganu wokugezela

17UJehova wasesithi kuMosi, 18“Yenza umganu wethusi ube lenyawo zethusi, ube ngowokugezela. Uwubeke phakathi kweThente lokuHlanganela le-alithare, uthele amanzi phakathi kwawo. 19U-Aroni lamadodana akhe bazageza izandla lezinyawo zabo ngamanzi akuwo. 20Nxa bengena eThenteni lokuHlanganela bazageza ngamanzi ukuze bangafi. Ngokunjalo lalapho besondela ealithareni ukuba bakhonze ngokwethula umnikelo onikelwa kuJehova ngomlilo,

21bazageza izandla zabo lezinyawo ukuze bangafi. Lokhu kuzakuba yisimiso esingapheliyo ku-Aroni lenzalo yakhe lakuzizukulwane ezizayo.”

Amafutha okugcoba abakhethiweyo

22UJehova wasesithi kuMosi, 23“Thatha lezinhlobo zamakha amahle: Amashekeli angamakhulu amahlanu emure elingamanzi, ikhinamoni elinuka mnandi eliyingxenye yalokho (okuyikuthi amakhulu amabili lamatshumi amahlanu amashekeli), amashekeli angamakhulu amabalili lamatshumi amahlanu ekhane elilephunga elimnandi, 24amashekeli angamakhulu amahlanu ekhasiya – konke kumayelana lamashekeli endawo engcwele – kanye lehini lamafutha ama-oliva. 25Lokhu kwenze kube ngamafutha angcwele okugcoba alungiswe ngumxubi wamakha, azakuba ngamafutha angcwele okugcoba abakhethiweyo. 26Ngawo-ke uzagcoba iThente lokuHlanganela, ibhokisi lobufakazi, 27itafula kanye lezitsha zalo zonke, uluthi lwesibane lezitsha zalo, i-alithare lempepha, 28i-alithare lomnikelo wokutshiswa lezitsha zalo lomganu wokugezela kanye lezinyawo zawo.

29Uzakungcwelisa konke ukuba kube ngcwele kakhulu, njalo loba yini ekuthintayo izakuba ngcwele.

30“Mgcobe u-Aroni lamadodana akhe ubahlukanisele ukuba bangisebenzele bengabaphristi. 31Batshele abako-Israyeli uthi, ‘Lokhu kuzakuba ngamafutha ami angcwele okugcoba abakhethiweyo lakuzizukulwane zenu ezizayo. 32Lingawatheli emizimbeni yabantu, njalo lingenzi amanye amafutha ngale inhlanganisela. Ingcwele, izakuba ngcwele lakini. 33Lowo ozakwenza amakha afana lawo kumbe agcobe ngawo umuntu ongasuye mphristi, uzasuswa ebantwini bakibo.’ ”

Impepha

34UJehova wabuya wathi kuMosi, “Thatha amakha anuka mnandi – isitakethe, i-onika legalibhanumi kanye lenhlaka enhle, konke kungesilinganiso esifanayo, 35wenze ingxube yempepha elephunga elimnandi njengomxubi wamakha, ifakwe itshwayi ibenhle ibe ngcwele.

36Chola enye yayo ibe yimpuphu uyifake phambi kobuFakazi phakathi kweThente lokuHlanganela lapho engizahlangana lawe khona. Izakuba ngcwele kakhulu kini.

37Lingazenzeli eyenu impepha ngale indlela, iboneni njengento engcwele kuJehova. 38Lowo ozakwenza enye efana layo ukuba akholise ukunuka kwayo mnandi, kumele asuswe ebantwini bakibo.”